ഷാര്‍ജ: യു.എ.ഇ-യിലെ പ്രമുഖ ജീവകാരുണ്യ കലാസാംസ്‌കാരിക സംഘടനയായ ദര്‍ശന യു.എ.ഇ-യുടെ പത്താമത് വാര്‍ഷികാഘോഷ പരിപാടികള്‍ ഷാര്‍ജ ഇന്ത്യന്‍ അസോസിയേഷന്‍ കമ്മ്യൂണിറ്റി ഹാളില്‍ സംഘടിപ്പിച്ചു. ആഘോഷങ്ങളുടെ ഭാഗമായി സാംസ്‌കാരിക സമ്മേളനവും കലാപരിപാടികളും അരങ്ങേറി. ദര്‍ശന ജനറല്‍ സെക്രട്ടറി ഷംസീര്‍ നാദാപുരത്തിന്റെ സ്വാഗതാശംസകളോടെയാണ് ആഘോഷവുമായി ബന്ധപ്പെട്ട സാസ്‌കാരിക പരിപാടികള്‍ക്ക് തുടക്കം കുറിച്ചത്. ചടങ്ങില്‍ ദര്‍ശന പ്രസിഡന്റ് സി.പി ജലീല്‍ അദ്ധ്യക്ഷത വഹിച്ചു. ഷാര്‍ജ ഇന്ത്യന്‍ അസോസിയേഷന്‍ പ്രസിഡന്റ് അഡ്വ വൈ.എ റഹീം ഉദ്ഘാടനം നിര്‍വഹിച്ച ചടങ്ങില്‍ കോണ്‍ഗ്രസിന്റെ മുഖപത്രമായ വീക്ഷണത്തിന്റെ മുന്‍ ചീഫ്-എഡിറ്റര്‍ ശ്രീകുമാര്‍ മുഖ്യ പ്രഭാഷണം നടത്തി. രാഷ്ട്രീയ-സാമൂഹ്യ പ്രവര്‍ത്തകനും ദര്‍ശനയുടെ രക്ഷാധികാരിയുമായ പുന്നക്കന്‍ മുഹമ്മദലി, ദർശന വര്‍ക്കിംഗ് പ്രസിഡണ്ട് ഷറഫുദ്ദീന്‍ വലിയകത്ത്, കെ. ബാലകൃഷ്ണന്‍, ഷിബു ജോണ്‍, നിസാര്‍ തളങ്കര, സാം വര്‍ഗ്ഗീസ്, എന്നിവര്‍ ആശംസകള്‍ പങ്കുവച്ചു. ദര്‍ശന ട്രഷറര്‍ കെ.വി ഫൈസല്‍ നന്ദി രേഖപ്പെടുത്തി. തുടര്‍ന്ന് നടന്ന കലാപരിപാടികള്‍ക്ക് ദര്‍ശനയുടെ കലാവിഭാഗം കണ്‍വീനറും പ്രോഗ്രാം ഡയറക്റ്ററുമായ വീണ ഉല്ലാസ് നേതൃത്വം നല്‍കി.
