കുവൈറ്റ് സിറ്റി: കുവൈറ്റിലെ ഗതാഗതക്കുരുക്ക് കഴിഞ്ഞ മാസങ്ങൾക്കിടയിൽ 30% കുറഞ്ഞതായി അധികൃതർ അറിയിച്ചു. കഴിഞ്ഞ വര്‍ഷം 24 സര്‍ക്കാര്‍ ഏജന്‍സികളില്‍ സർക്കാർ ഓഫീസുകളുടെ പ്രവൃത്തി സമയത്തിൽ ചെറിയ മാറ്റങ്ങൾ വരുത്തിയതിനെ തുടർന്നാണ് രാജ്യത്തെ ഗതാഗതക്കുരുക്കില്‍ ഗണ്യമായ കുറവ് രേഖപ്പെടുത്തിയതെന്ന് ട്രാഫിക് വിഭാഗം പുറത്തുവിട്ട കണക്കുകൾ വ്യക്തമാക്കുന്നു. ജീവനക്കാർ ഓഫീസിൽ എത്തേണ്ട സമയത്തിൽ ചെറിയ മാറ്റങ്ങൾ വരുത്തിയാണ് പദ്ധതി നടപ്പിലാക്കിയത്.
എല്ലാവരും ഒരേ സമയത്ത് ജോലിക്ക് ഹാജരാകുന്നതിന് പകരം അല്പസമയം വൈകി ഓഫീസിൽ എത്തുകയും നഷ്ടമായ സമയത്തിന് പകരമായി അധിക സമയം ജോലി ചെയ്യാൻ അനുവദിക്കുകയും ചെയ്യുന്നതായിരുന്നു പരിഷ്കാരം. ഇതുപ്രകാരം വ്യത്യസ്ത സമയങ്ങജിൽ ജീവനക്കാർ ഓഫീസിലെത്തുന്നതു മൂലം റോഡിൽ വാഹനങ്ങളുടെ എണ്ണം വലിയ തോതിൽ കുറയ്ക്കാനായി. അടുത്ത വര്‍ഷം ആദ്യത്തിൽ നടപ്പിലാക്കുമെന്ന് പ്രതീക്ഷിക്കുന്ന സായാഹ്ന ഷിഫ്റ്റ് സംവിധാനം യാഥാർഥ്യമാകുന്നതോടെ രാജ്യത്തെ ഗതാഗതക്കുരുക്ക് കൂടുതല്‍ ലഘൂകരിക്കാനാകുമെന്ന് അധികൃതർ അറിയിച്ചു.
ട്രാഫിക് മാനേജ്മെന്‍റിനും പരിഹാരത്തിനുമായി ബന്ധപ്പെട്ട സര്‍ക്കാര്‍ ഏജന്‍സികള്‍ നൂതനമായ തന്ത്രങ്ങള്‍ മെനയുന്നത് തുടരുമെന്നും അധികൃതർ വ്യക്തമാക്കി. രാജ്യത്തെ ഗ്രാഫിക് പ്രശ്നത്തിന് കാര്യക്ഷമമായ പരിഹാരങ്ങള്‍ ആസൂത്രണം ചെയ്യാന്‍ മന്ത്രിസഭാ സമിതി നിയോഗിച്ച ഒമ്പത് സര്‍ക്കാര്‍ ഏജന്‍സികളുടെ കൂട്ടായ ആലോചനകൾക്കും പഠനങ്ങൾക്കും ശേഷമാണ് ജോലിസമയത്തിലെ മാറ്റം സായാഹ്ന ഷിഫ്റ്റ് തുടങ്ങിയ പരിഷ്കാരങ്ങൾ കുവൈറ്റ് ഭരണകൂടം നടപ്പിലാക്കുന്നത്.
ആഭ്യന്തര മന്ത്രാലയം, ധനകാര്യ മന്ത്രാലയം, പൊതുമരാമത്ത് മന്ത്രാലയം, വിദ്യാഭ്യാസ മന്ത്രാലയം, വാര്‍ത്താവിനിമയ മന്ത്രാലയം, കുവൈറ്റ് മുനിസിപ്പാലിറ്റി, റോഡ്സ് ആന്‍ഡ് ട്രാന്‍സ്പോര്‍ട്ടേഷന്‍ പബ്ലിക് അതോറിറ്റി, സിവില്‍ സര്‍വീസ് ബ്യൂറോ, നിയമനിര്‍മ്മാണ വകുപ്പ്, ഫത്വവ കൗൺസിൽ എന്നിവയുള്‍പ്പെടെ നിരവധി മന്ത്രാലയങ്ങളാണ് പരിഷ്ക്കാരങ്ങൾക്ക് നേതൃത്വം നൽകുന്നത്‌. 2024 ഓഗസ്റ്റ് ഒന്നിനാണ് ട്രാഫിക് പ്രശ്നത്തിന് പരിഹാരം കാണുന്നതിനായി ഈ ഏജൻസികളെ നിയോഗിച്ചത്. ആറ് മാസത്തിനുള്ളില്‍ അഥവാ ഡിസംബറിന് മുമ്പായി അവരുടെ പ്രവര്‍ത്തന പദ്ധതിയും നടപ്പിലാക്കിയ നടപടികളും വിശദമാക്കുന്ന ഒരു സമഗ്ര റിപ്പോര്‍ട്ട് സമര്‍പ്പിക്കാനാണ് നൽകിയിരിക്കുന്ന നിർദ്ദേശം.