തിരുവന്തപുരം: പ്രവാസി മലയാളികളുടെ നിയമ പ്രശ്നങ്ങള് കൈകാര്യം ചെയ്യാന്‍ വിദേശ രാജ്യത്ത് മലയാളികളായ അഭിഭാഷകരുടെ സൗജന്യ സേവനം ലഭ്യമാക്കുന്നതാണ് നോര്‍ക്ക റൂട്ട്‌സിന്റെ പ്രവാസി നിയമസഹായ പദ്ധതി. വിദേശ രാജ്യങ്ങളിലെ നിയമത്തെക്കുറിച്ചുള്ള അജ്ഞത, ചെറിയ കുറ്റകൃത്യങ്ങള്‍ എന്നിവ മൂലവും, തന്റെതല്ലാത്ത കാരണങ്ങളാലും നിയമക്കുരുക്കില്‍ അകപ്പെടുന്ന പ്രവാസികള്‍ക്കായി സംസ്ഥാന സര്‍ക്കാര്‍ നോര്‍ക്ക റൂട്ട്സ് വഴി നടപ്പിലാക്കുന്ന പദ്ധതിയാണിത്.
പ്രവാസി നിയമസഹായ സെല്‍ പദ്ധതിയുടെ കീഴില്‍ യു.എ.ഇ-യില്‍ അബുദാബി, ഷാര്‍ജ, ദുബായ് എന്നിവിടങ്ങളിലും സൗദി അറേബ്യയില്‍ റിയാദ്, ദമാം, ജിദ്ദ എന്നീ പ്രദേശങ്ങളിലും ബഹ്‌റൈനില്‍ മനാമ കേന്ദ്രീകരിച്ചും ഒമാനില്‍ മസ്‌ക്കറ്റിലും കുവൈറ്റില്‍ തലസ്ഥാനമായ കുവൈറ്റ് സിറ്റിയിലും ഖത്തര്‍ തലസ്ഥാനമായ ദോഹയിലും മലേഷ്യയില്‍ കോലാലമ്പൂരിലുമാണ് ലീഗല്‍ കണ്‍സള്‍ട്ടന്റ്മാരെ തെരഞ്ഞെടുക്കുന്നത്. താല്‍പര്യമുള്ള മലയാളി അഭിഭാഷകരില്‍ നിന്നുമാണ് നോര്‍ക്ക-റൂട്ട്സ് അപേക്ഷ ക്ഷണിക്കുന്നത്.
കേസുകളിന്‍ മേല്‍ നിയമോപദേശം, നഷ്ടപരിഹാരം/ദയാഹര്‍ജികള്‍ എന്നിവയില്‍ സഹായിക്കുക, മലയാളി സാംസ്‌ക്കാരിക സംഘടനകളുമായി ചേര്‍ന്ന് നിയമ ബോധവത്കരണ പരിപാടികള്‍ സംഘടിപ്പിക്കുക, വിവിധ ഭാഷകളില്‍ തര്‍ജ്ജിമ നടത്തുന്നതിന് വിദഗ്ദ്ധരുടെ സഹായം ലഭ്യമാക്കുക, എന്നിവയ്ക്ക് അതത് രാജ്യത്തെ മലയാളി അഭിഭാഷകരുടെ സേവനം ലഭ്യമാക്കുന്നതിനാണ് പദ്ധതി ലക്ഷ്യമിടുന്നത്.
യോഗ്യതകള്‍
1. അപേക്ഷിക്കുന്ന വ്യക്തി കേരളീയനായിരിക്കണം. മലയാള ഭാഷ എഴുതുവാനും സംസാരിക്കുവാനും കഴിവുള്ള വ്യക്തിയായിരിക്കണം.
2. അതത് വിദേശ രാജ്യങ്ങളിലെ പ്രാദേശിക ഭാഷകള്‍ കൈകാര്യം ചെയ്യുവാന്‍ കഴിവുള്ള വ്യക്തിയുമായിരിക്കണം.
3. അഡ്വക്കേറ്റായി കേരളത്തില്‍ കുറഞ്ഞത് 2 വര്‍ഷവും വിദേശത്ത് 7 വര്‍ഷവും പ്രവൃത്തി പരിചയമുള്ള വ്യക്തിയായിരിക്കണം. ജി.സി.സി രാജ്യങ്ങളിലെ നിയമ പ്രശ്നങ്ങള് കൈകാര്യം ചെയ്ത് പ്രവൃത്തി പരിചയമുള്ളവരും നിലവില്‍ അതത് രാജ്യങ്ങളില്‍ അഭിഭാഷകനായി പ്രാക്ടീസ് ചെയ്യുന്നവരുമായിരിക്കണം.
4. അതത് രാജ്യത്തെ അഭിഭാഷകരുടെ കൂടെയോ/നിയമസ്ഥാപനങ്ങളിലോ കുറഞ്ഞത് രണ്ടുവര്‍ഷത്തെ തൊഴില്‍ പരിചയം നിര്‍ബന്ധമാണ്.
5. വിദ്യാഭ്യാസ/പ്രവൃത്തിപരിചയ രേഖകളുടെ പകര്‍പ്പുകളും വിദേശമലയാളികള്‍ സാധാരണ നേരിടുന്ന നിയമപ്രശ്‌നങ്ങളും അവയ്ക്കുള്ള പരിഹാര സാദ്ധ്യതകളും സംബന്ധിച്ച് 200 വാക്കില്‍ കുറയാത്ത ഒരു കുറിപ്പും മലയാളത്തില്‍ തയ്യാറാക്കി അപേക്ഷയോടൊപ്പം അനുബന്ധമായി അയക്കേണ്ടതാണ്.
മറ്റ് നിബന്ധനകള്‍
1. ഹോണറേറിയം ഇന്ത്യന്‍ രൂപയായിട്ടായിരിക്കും നല്‍കുക. നോര്‍ക്ക ലീഗല്‍ കണ്‍സള്‍ട്ടന്റായി തിരഞ്ഞെടുക്കപ്പെടുന്ന വ്യക്തിക്ക് ഇന്ത്യയില്‍ ദേശസാത്കൃത ബാങ്കില്‍ അക്കൗണ്ട് ഉണ്ടായിരിക്കണം.
2. നോര്‍ക്ക ലീഗല്‍ കണ്‍സള്‍ട്ടന്റിന്റെ നിയമന കാലാവധി 2 വര്‍ഷത്തേക്കായിരിക്കും. കരാറിലെ വ്യവസ്ഥകള്‍ പ്രകാരമുള്ള പ്രവര്‍ത്തനം ലീഗല്‍ കണ്‍സള്‍ട്ടന്റ് കാഴ്ചവയ്ക്കാത്ത പക്ഷം നിയമനം റദ്ദ് ചെയ്യുന്നതായിരിക്കും.
3. തിരഞ്ഞെടുക്കപ്പെടുന്ന വ്യക്തി നോര്‍ക്ക-റൂട്ട്സ് തയ്യാറാക്കിയിട്ടുള്ള കരാറില്‍ ചീഫ് എക്‌സിക്യൂട്ടീവ് ഓഫീസറുടെ സാന്നിദ്ധ്യത്തില്‍ ഒപ്പ് വയ്‌ക്കേണ്ടതാണ്.
4. അപേക്ഷാഫാറം ഓണ്‍ലൈനായി സമര്‍പ്പിക്കാവുന്നതാണ്. ഓണ്‍ലൈനായി അപേക്ഷ സമര്‍പ്പിക്കേണ്ട വിലാസം. esection.norka@kerala.gov.in. അപേക്ഷ സമര്‍പ്പിക്കേണ്ട അവസാന തീയതി 2023 ആഗസ്റ്റ് 15.
