പാലക്കാട്: പത്തനംതിട്ടയില്‍ നിന്നും കോയമ്പത്തൂരിലേക്ക് ഇന്നുരാവിലെ പുറപ്പെട്ട റോബിന്‍ എന്ന ബസിന് വ്യത്യസ്ത സ്ഥലങ്ങളിലെ പരിശോധനയിലൂടെ കേരളത്തിലെ ഗതാഗതവകുപ്പ് ഇന്ന് ചുമത്തിയത് 30,000 രൂപയുടെ പിഴ. നിലവില്‍ വാഹനം വാളയാര്‍ ബോര്‍ഡര്‍ കടന്ന് യാത്ര തുടരുകയാണ്. ഇതിനിടയിലാണ് പെര്‍മിറ്റ് ലംഘനം ചൂണ്ടിക്കാട്ടി ഇത്രയും തുക പിഴ ചുമത്തിയത്. പത്തനംതിട്ടയില്‍ നിന്നും സര്‍വീസ് ആരംഭിച്ചതിന് പിന്നാലെ നാല് സ്ഥലങ്ങളില്‍ മോട്ടോര്‍ വാഹന വകുപ്പ് വാഹനത്തില്‍ പരിശോധന നടത്തി. പത്തനംതിട്ട, പാലാ, അങ്കമാലി, പുതുക്കാട് എന്നിവിടങ്ങളില്‍ എത്തിയപ്പോഴാണ് പരിശോധനയ്ക്കായി എം.വി.ഡി ഉദ്യോഗസ്ഥര്‍ ബസ് തടഞ്ഞത്. എന്നാല്‍ പതിവില്‍ നിന്നും വിപരീതമായി പരിശോധന നടത്തി വാഹനം പിടിച്ചെടുക്കാതെ പിഴയീടാക്കി ബസിനെ പോകാന്‍ അനുവദിക്കുകയായിരുന്നു.
അതേസമയം മോട്ടോര്‍ വാഹന വകുപ്പിന്റെ പ്രതികാര നടപടിക്കെതിരെ പലയിടങ്ങളിലും നാട്ടുകാരും സംഘടിച്ചെത്തി ‘റോബിന്‍’ ബസുടമയ്ക്ക് പിന്തുണ അറിയിച്ചു. വഴിനീളെ നിരവധി പേരാണ് റോബിന്‍ ബസിന് ഹാരാര്‍പ്പണം നടത്തിയും മോട്ടോര്‍വാഹന ഉദ്യോഗസ്ഥരോട് കയര്‍ത്തും കൂകി വിളിച്ചും ബസിന് പിന്തുണയുമായി തെരുവിലിറങ്ങിയത്. തൊടുപുഴയിലെത്തിയ ബസിന് ബസ് സ്റ്റാന്‍ഡില്‍ വന്‍ സ്വീകരണമൊരുക്കിയും നാട്ടുകാര്‍ പ്രതിഷേധിച്ചു. മുമ്പ് രണ്ടുതവണ എം.വി.ഡി പിടികൂടിയ ബസ് ഹൈക്കോടതിയുടെ സംരക്ഷണം വാങ്ങിയാണ് റോഡിലിറങ്ങുന്നതെന്ന് ബസുടമ കഴിഞ്ഞ ദിവസം അറിയിച്ചിരുന്നു. ടൂറിസ്റ്റ് പെര്‍മിറ്റുള്ള ബസ് സ്റ്റേറ്റ് കാര്യേജ് ആയി ഓടാന്‍ അനുവദിക്കില്ലെന്ന നിലപാടില്‍ ഉറച്ച് നില്‍ക്കുകയാണ് മോട്ടോര്‍ വാഹന വകുപ്പ്. പിഴ ചുമത്തിയ ശേഷവും യാത്ര തുടരുന്ന ബസിനെ വഴിയില്‍ ഇനിയും എം.വി.ഡി ഉദ്യോഗസ്ഥര്‍ തടഞ്ഞ് പിഴ ചുമത്തിയേക്കും.
അതേസമയം മോട്ടോർ വാഹനവകുപ്പുമായി ഏറ്റുമുട്ടുന്ന റോബിൻ ബസിനെ പൂട്ടാൻ പുതിയ തന്ത്രവുമായി കെഎസ്ആർടിസി തയ്യാരെടുക്കുന്നു. നാളെ ഞായറാഴ്ച മുതൽ പത്തനംതിട്ട – ഈരാറ്റുപേട്ട – കോയമ്പത്തൂർ വോൾവോ എസി സർവീസ് ആരംഭിക്കാനാണ് നീക്കം. പത്തനംതിട്ടയിൽ നിന്നും രാവിലെ 04:30-ന് ആരംഭിക്കുന്ന സർവീസ് തിരികെ കോയമ്പത്തൂരിൽ നിന്നും വൈകുന്നേരം 04:30-ന് പുറപ്പെടും. റാന്നി, എരുമേലി, കാഞ്ഞിരപ്പള്ളി, ഈരാറ്റുപേട്ട, തൊടുപുഴ, മൂവാറ്റുപുഴ, അങ്കമാലി, തൃശൂർ, വടക്കാഞ്ചേരി, പാലക്കാട് വഴിയാണ് സർവീസ് നടത്തുക.
