ദുബായ്: ബ്രാന്‍ഡ് ഉല്‍പ്പന്നങ്ങള്‍ ഉള്‍പ്പെടെയുള്ളവയ്ക്ക് 90 ശതമാനം വരെ ഡിസ്‌കൗണ്ട് ഓഫറുകളുമായി ദുബായ് സമ്മര്‍ സര്‍പ്രൈസസ് (ഡിഎസ്എസ്) 2024. ഓഗസ്റ്റ് 30 മുതല്‍ സെപ്റ്റംബര്‍ ഒന്നു വരെ നടക്കുന്ന ഡിഎസ്എസ് ഫൈനല്‍ സെയിലിലൂടെ ദുബായ് ഫെസ്റ്റിവല്‍സ് ആന്‍ഡ് റീട്ടെയില്‍ എസ്റ്റാബ്ലിഷ്മെന്‍റ് (ഡിഎഫ്ആര്‍ഇ) ഏറ്റവും വലിയ ഓഫറുകളാണ് പ്രഖ്യാപിച്ചിരിക്കുന്നത്. 550 ലധികം ബ്രാന്‍ഡ് ഉല്‍പ്പന്നങ്ങള്‍ക്ക് വമ്പിച്ച വിലക്കിഴിവ് വാഗ്ദാനം ചെയ്യുന്ന ഡിഎസ്എസ്സില്‍, 2,500ലധികം ഔട്ട്ലെറ്റുകളില്‍ 90 ശതമാനം വരെ കിഴിവ് ലഭിക്കുമെന്ന് അധികൃതര്‍ അറിയിച്ചു.
ലൈഫ്സ്റ്റൈല്‍, ഫാഷന്‍, ബ്യൂട്ടി, ഇലക്ട്രോണിക്സ്, ഹോംവെയര്‍ എന്നിവയിലുടനീളമുള്ള മുന്‍നിര ബ്രാന്‍ഡുകളില്‍ കൂടുതല്‍ ഡിസ്‌കൗണ്ടുകള്‍ നല്‍കിക്കൊണ്ട് ഷോപ്പിങ് വാരാന്ത്യത്തിനായി തയ്യാറെടുക്കാന്‍ ഷോപ്പര്‍മാരോട് ദുബായ് ഫെസ്റ്റിവല്‍സ് ആന്‍ഡ് റീട്ടെയില്‍ എസ്റ്റാബ്ലിഷ്മെന്‍റ് അഭ്യർഥിച്ചു. മൂന്ന് ദിവസം മാത്രം നീണ്ടു നില്‍ക്കുന്ന മെഗാ ഓഫറുകളിലൂടെ കുറഞ്ഞ വിലയില്‍ ഇഷ്ടപ്പെട്ട സാധനങ്ങളെല്ലാം വീട്ടിലേക്ക് കൊണ്ടുപോകാനും ഷോപ്പിങ് മാമാങ്കം ആസ്വദിക്കാനുമുള്ള സുവര്‍ണാവസരം ഡിഎസ്എസ് ഫൈനല്‍ സെയില്‍ നല്‍കുന്നു. ഉല്‍പ്പന്നങ്ങള്‍ക്കുള്ള വലിയ ഡിസ്‌കൗണ്ടുകള്‍ക്കു പുറമെ, അധിക പ്രോത്സാഹനം എന്ന നിലയില്‍ ഡിഎസ്എസ്സില്‍ പങ്കെടുക്കുന്ന വിവിധ സ്റ്റോറുകള്‍ ആകര്‍ഷകമായ സമ്മാനങ്ങള്‍ നേടാനുള്ള അവസാന അവസരവും വാഗ്ദാനം ചെയ്യുന്നുണ്ട്. ഒരു പുതിയ ജാഗ്വാര്‍ എഫ് പേസ്, ലെക്‌സസ് ഹൈബ്രിഡ് എസ്യുവികള്‍, 5,000 ദിര്‍ഹമിന്‍റെ കാഷ് പ്രൈസ്, 10,000 ദിര്‍ഹം ടിക്കറ്റ് പോയിന്‍റുകള്‍, 70,000 ദിര്‍ഹം വിലമതിക്കുന്ന വജ്രവും സ്വര്‍ണ്ണവും കൊണ്ടുള്ള ആഭരണങ്ങള്‍ തുടങ്ങിയവയാണ് സര്‍പ്രൈസ് പ്രൈസായി ലഭിക്കുക.
റ്റി സെന്‍റര്‍ ദെയ്റ, സിറ്റി സെന്‍റര്‍ മെഐസെം, സിറ്റി സെന്‍റര്‍ മിര്‍ദിഫ്, സര്‍ക്കിള്‍ മാള്‍, സിറ്റി വാക്ക്, ഡ്രാഗണ്‍ മാര്‍ട്ട്, ദുബായ് ഫെസ്റ്റിവല്‍ സിറ്റി മാള്‍, ദുബായ് ഫെസ്റ്റിവല്‍ പ്ലാസ, ഇബ്ന്‍ ബത്തൂത്ത മാള്‍, മാള്‍ ഓഫ് എമിറേറ്റ്‌സ്, മെര്‍കാറ്റോ, ടൗണ്‍ സെന്‍റര്‍ ജുമൈറ, നഖീല്‍ മാള്‍, ഒയാസിസ് സെന്റര്‍ മാള്‍, ദി ബീച്ച് ജെബിആര്‍, ദി ഔട്ട്ലെറ്റ് വില്ലേജ്, വാഫി സിറ്റി എന്നിവയുള്‍പ്പെടെ ദുബായിലെ പ്രമുഖ ഷോപ്പിങ് മാളുകളിലും റീട്ടെയില്‍ ഡെസ്റ്റിനേഷനുകളിലും നഗരത്തില്‍ വ്യാപിച്ചു കിടക്കുന്ന ഷോറൂമുകളിലുമായി ഡിഎസ്എസ് മഹാമേള നടക്കുന്നുണ്ട്.