ഒമാൻ മസ്ജിദ് ആക്രമണം; കുറ്റവാളികൾ ഒമാൻ പൗരന്മാരാണെന്ന് ഒമാൻ പോലീസ്
ഒമാൻ: അൽ-വാദി അൽ-കബീർ വെടിവയ്പ്പ് സംഭവത്തിലെ സംഭവവികാസങ്ങളെക്കുറിച്ച് പൊതുജനങ്ങളെ അറിയിക്കാനുള്ള പ്രതിജ്ഞാബദ്ധതയിൽ റോയൽ ഒമാൻ പോലീസ്. സംഭവത്തിൽ ഉൾപ്പെട്ട മൂന്ന് കുറ്റവാളികൾ ഒമാൻ പൗരന്മാരും സഹോദരങ്ങളുമാണെന്ന് സ്ഥിരീകരിച്ചു. തെറ്റിദ്ധരിപ്പിക്കുന്ന ആശയങ്ങളാൽ സ്വാധീനിക്കപ്പെട്ടവരാണ് അക്രമികളെന്ന് പോലീസ് വ്യാഴാഴ്ച പ്രസ്താവനയിൽ പറഞ്ഞു.
സുരക്ഷാ ഉദ്യോഗസ്ഥരെ ചെറുക്കണമെന്ന നിർബന്ധത്തെ തുടർന്നാണ് ഇവർ കൊല്ലപ്പെട്ടത്. തെറ്റായ ആശയങ്ങളാണ് ഇവരെ സ്വാധീനിച്ചതെന്നാണ് അന്വേഷണങ്ങൾ സൂചിപ്പിക്കുന്നത്. തങ്ങളുടെ രാജ്യത്തിൻ്റെ സുരക്ഷയ്ക്കും വേണ്ടിയുള്ള ജാഗ്രതയ്ക്കും ഉത്കണ്ഠയ്ക്കും പ്രതിബദ്ധതയ്ക്കും റോയൽ ഒമാൻ പോലീസ് എല്ലാവരോടും നന്ദിയും കടപ്പാടും അറിയിച്ചു.
ഒമാൻ തലസ്ഥാനമായ മസ്‌കറ്റിലെ വാദി അൽ കബീർ അയൽപക്കത്തുള്ള അലി ബിൻ അബി താലിബ് പള്ളിയിൽ തിങ്കളാഴ്ച വൈകുന്നേരമാണ് ആക്രമണം ആരംഭിച്ചത്. ആക്രമണത്തിൽ ഒരു ഇന്ത്യക്കാരനും നാല് പാകിസ്താൻകാരും ഒരു റോയൽ ഒമാൻ പോലീസ് ഉദ്യോഗസ്ഥനും അക്രമി സംഘത്തിലെ മൂന്നുപേരും കൊല്ലപ്പെട്ടിരുന്നു. ഒമാനിലെ ഷിയാ വിശ്വാസികൾ പ്രാർഥന നടത്തുന്ന മുസ്ലീം പള്ളിയാണിത്. ഇവിടെ പ്രാർഥിക്കാൻ എത്തിയവരാണ് കൊല്ലപ്പെട്ട അഞ്ചു പേരെന്നാണ് റിപ്പോർട്ട്. ആക്രമണത്തിൽ നിരവധി സുരക്ഷാ ഉദ്യോഗസ്ഥർ ഉൾപ്പെടെ വിവിധ രാജ്യക്കാരായ 28 പേർക്ക് പരിക്കേറ്റതായി ഒമാൻ പോലീസ് സ്ഥിരീകരിച്ചിരുന്നു.