ന്യൂഡല്‍ഹി: വിമാന ടിക്കറ്റുകള്‍ക്ക് ഇളവ് പ്രഖ്യാപിച്ച് എയര്‍ ഇന്ത്യ. ‘നമസ്തേ വേള്‍ഡ് സെയില്‍’ എന്ന പേരിൽ ആരംഭിച്ച ഡിസ്‌കൗണ്ട് സെയിലിൽ ആണ് ഈ സുവർണാവസരം. ആഭ്യന്തര, അന്തര്‍ദേശീയ വിമാന ടിക്കറ്റുകള്‍ വെറും 1,799 രൂപ മുതലാണ് നല്‍കുന്നത്. ഫെബ്രുവരി രണ്ട് മുതല്‍ ആരംഭിച്ച ഡിസ്‌കൗണ്ട് സെയിലിലൂടെ കുറഞ്ഞ നിരക്കില്‍ ഫെബ്രുവരി അഞ്ച് വരെ ടിക്കറ്റുകള്‍ വാങ്ങാനുള്ള അവസരമുണ്ട്. സെപ്റ്റംബര്‍ 30 വരെയുള്ള വിമാന യാത്രാ ടിക്കറ്റുകള്‍ ഉപഭോക്താക്കള്‍ക്ക് ഓഫര്‍ നിരക്കില്‍ ബുക്ക് ചെയ്യാന്‍ സാധിക്കും. ഇതിനു ശേഷമുള്ള ടിക്കറ്റുകള്‍ ‘നമസ്തേ വേള്‍ഡ് സെയില്‍’ ഓഫര്‍ പരിധിയില്‍ വരില്ലെന്ന് എയര്‍ ഇന്ത്യ വ്യക്തമാക്കി.
ആഭ്യന്തര വിമാനങ്ങളിലെ ഇക്കണോമി ക്ലാസ് ടിക്കറ്റുകളാണ് 1,799 രൂപ നിരക്കില്‍ ആരംഭിക്കുന്നത്. ഇതേ സര്‍വീസിലെ കുറഞ്ഞ ബിസിനസ് ക്ലാസ് നിരക്ക് 10,899 രൂപയാണ്. എക്സിക്യൂട്ടീവ്, പ്രീമിയം ഇക്കോണമി ക്ലാസുകള്‍ക്ക് പ്രത്യേക നിരക്കുകളും എയര്‍ലൈന്‍ ഏര്‍പ്പെടുത്തിയിട്ടുണ്ട്. ഓഫര്‍ കാലം പരിമിതമായതിനാല്‍ ടിക്കറ്റുകള്‍ പെട്ടെന്ന് വിറ്റുതീരാന്‍ സാധ്യതയുണ്ട്. ആദ്യം ബുക്ക് ചെയ്യുന്നവര്‍ക്ക് ആദ്യം ടിക്കറ്റ് എന്ന നയമാണ് കമ്പനി സ്വീകരിച്ചിരിക്കുന്നത്. ട്രാവല്‍ ഏജന്‍സികള്‍ വഴിയും എയര്‍ ഇന്ത്യയുടെ വെബ്സൈറ്റില്‍ നിന്നും ആപ്പില്‍ നിന്നും ഫ്‌ളൈറ്റ് ടിക്കറ്റുകള്‍ ബുക്ക് ചെയ്യാം. വെബ്സൈറ്റിലൂടെയും ആപ്പിലൂടെയും ഫ്‌ലൈറ്റ് ടിക്കറ്റുകള്‍ ബുക്ക് ചെയ്യുന്നതിലൂടെ ഉപഭോക്താക്കള്‍ക്ക് സേവന നിരക്കുകള്‍ ലാഭിക്കാം.
അതേസമയം ഗള്‍ഫ് രാജ്യങ്ങള്‍ ഉള്‍പ്പെടെ എയര്‍ ഇന്ത്യയുടെ എല്ലാ അന്താരാഷ്ട്ര സര്‍വീസുകളും ‘നമസ്തേ വേള്‍ഡ് സെയില്‍’ ഓഫറില്‍ ഉള്‍പ്പെടും. അമേരിക്ക, കാനഡ, ബ്രിട്ടന്‍, യൂറോപ്പ്, ഓസ്ട്രേലിയ, മിഡില്‍ ഈസ്റ്റ്, ഏഷ്യാ പസഫിക്, ദക്ഷിണേഷ്യ എന്നിവിടങ്ങളിലേക്കുള്ള ടിക്കറ്റുകള്‍ ഡിസ്‌കൗണ്ട് നിരക്കില്‍ ബുക്ക് ചെയ്യാവുന്നതാണ്.