ദുബായ്: ദുബായിൽ പറക്കും ടാക്‌സികൾക്കായുള്ള ആദ്യ ‘വെർട്ടിപോർട്ടിൻ്റെ’ (വെർട്ടിക്കൽ പോർട്ട്) നിർമാണം ആരംഭിച്ചതായി ദുബായ് കിരീടാവകാശി. എക്‌സിലെ തൻ്റെ അക്കൗണ്ടിൽ നൽകിയ ഒരു പോസ്റ്റിലാണ് ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് എക്‌സിക്യൂട്ടീവ് കൗൺസിൽ ചെയർമാനുമായ ശെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം, ഏരിയൽ ടാക്സി വെർട്ടിപോർട്ട് നിർമ്മിക്കുന്നതായി പ്രഖ്യാപിച്ചത്. ദുബായ് ഇൻ്റർനാഷണൽ എയർപോർട്ടിന് സമീപത്താണ് ആദ്യ വെർട്ടി പോർട്ടിൻ്റെ നിർമാണം പുരോഗമിക്കുന്നത്.
3,100 ചതുരശ്ര മീറ്റർ വിസ്തൃതിയുള്ള ഈ പോർട്ടിന് പ്രതിവർഷം 42,000 എയർ ടാക്സി ലാൻഡിംഗുകളും 170,000 യാത്രക്കാരെയും കൈകാര്യം ചെയ്യാനുള്ള ശേഷിയുണ്ടാകും. പുതിയ വെർട്ടിപോർട്ട് നിർമാണത്തിലൂടെ നവീകരണം, സുരക്ഷ, സുസ്ഥിരത എന്നിവയിൽ ഉറച്ച പ്രതിബദ്ധതയോടെ ദുബായ് ആഗോള മൊബിലിറ്റിയുടെ ഭാവി രൂപപ്പെടുത്തുന്നത് തുടരുകയാണെന്ന് ശെയ്ഖ് ഹംദാൻ കൂട്ടിച്ചേർത്തു. ആദ്യത്തെ എയർ ടാക്സി സ്റ്റേഷൻ്റെ ഔദ്യോഗിക പ്രവർത്തനം 2026 ആദ്യ പാദത്തിൽ ആരംഭിക്കാൻ കഴിയുമെന്ന പ്രതീക്ഷയിലാണ് ദുബായ് അധികൃതർ. കൂടാതെ പദ്ധതിയിൽ നാല് സ്റ്റേഷനുകളുടെ പ്രാരംഭ ലോഞ്ചിംഗും ഉൾപ്പെടുന്നു. സേവനത്തിൻ്റെ ആദ്യ ഘട്ടത്തിൽ ദുബായിലെ നാല് തന്ത്രപ്രധാനമായ ലാൻഡിംഗ് സൈറ്റുകളാണ് ഒരുക്കുന്നത് – ദുബായ് ഇൻ്റർനാഷണൽ എയർപോർട്ട്, ഡൗൺടൗൺ, ദുബായ് മറീന, പാം ജുമൈറ.
അവ സ്‌കൈപോർട്ടുമായി സഹകരിച്ച് രൂപകല്പന ചെയ്യുകയും വികസിപ്പിക്കുകയും ചെയ്യും, അവയിൽ സമർപ്പിത ടേക്ക്-ഓഫ്, ലാൻഡിംഗ് ഏരിയകൾ, ഇലക്ട്രിക് ചാർജിംഗ് സൗകര്യങ്ങൾ, ഒരു പ്രത്യേക പാസഞ്ചർ ഏരിയ, സുരക്ഷാ സംവിധാനങ്ങൾ എന്നിവ ഉൾപ്പെടുന്നു. ദുബായ് അന്താരാഷ്ട്ര വിമാനത്താവളത്തിൽ നിന്ന് പാം ജുമൈറയിലേക്കുള്ള യാത്രാ സമയം 10-12 മിനിറ്റായി കുറയ്ക്കുമെന്ന് പ്രതീക്ഷിക്കുന്നതിനാൽ പുതിയ സർവീസ് ദുബായിലെ ഗതാഗതക്കുരുക്ക് ലഘൂകരിക്കാൻ സഹായിക്കും. അതിനിടെയാണ് പത്തു വർഷം പൂർത്തിയാക്കി ദുബായ് ട്രാം സർവീസ്. 2014 നവംബർ 11നായിരുന്നു ദുബായ് ഈ ട്രാം സർവീസ് തുടങ്ങുന്നത്. 60 ലക്ഷം കിലോമീറ്ററാണ് ഈ 10 വർഷത്തിനുള്ളിൽ ട്രാം സഞ്ചരിച്ചത്. ആറ് കോടിയിലധികം പേർ ട്രാമിൽ യാത്ര പൂർത്തിയാക്കുകയും ചെയ്തതായി ദുബൈ റോഡ് ഗതാഗത അതോറിറ്റി (ആർ.ടി.എ) അറിയിച്ചു.